Samruni Pressunnar ehf. og DV ehf.

• Sækja skjal
• Málsnúmer: 41/2014
• Dagsetning: 19/12/2014
• Fyrirtæki:
  • DV ehf.
  • Pressan ehf.
• Atvinnuvegir:
  • Fjarskipti, upplýsingatækni og fjölmiðlun
  • Aðrir fjölmiðlar
• Málefni:
  • Samrunamál
• Reifun

  Samkeppniseftirlitinu barst tilkynning um samruna Pressunnar ehf. og DV ehf. ásamt samrunaskrá þann 13. nóvember 2014 vegna kaupa Pressunnar ehf. á samtals 70,84% hlutafjár í DV ehf. Umrædd kaup fólu í sér samruna að mati eftirlitsins í skilningi 17. gr. samkeppnislaga og 62. gr. b fjölmiðlalaga. Við meðferð málsins barst beiðni um undanþágu frá banni við framkvæmd samruna DV og Pressunnar, sbr. 4. mgr. 17. gr. a samkeppnislaga, á meðan eftirlitið fjallar um hann. Með vísan til þeirra röksemda sem færðar voru fram féllst eftirlitið á að veita umrædda undanþágu.

  Að mati Samkeppniseftirlitsins voru þeir markaðir sem samruninn hafði einkum áhrif á annars vegar markaður fyrir vefmiðla / fréttaveitu á netinu og hins vegar markaður fyrir auglýsingar í vefmiðlum. Samruninn fól í sér láréttan samruna þar sem hvorugur samrunaaðila er markaðsráðandi á þessum mörkuðum og því ljóst að samruninn hafði ekki í för með sér styrkingu á markaðsráðandi stöðu sem ella gæti leitt til íhlutunar. Þá leiddi samruninn heldur ekki til þess að markaðsráðandi staða eins eða fleiri samrunaaðila yrði til.

  Að undangenginni rannsókn var það niðurstaða Samkeppniseftirlitsins að engar vísbendingar væru um að samruni Pressunnar og DV hefði í för með sér að samkeppni, fjölræði eða fjölbreytni á mörkuðum málsins væri raskað með þeim hætti að þörf væri á íhlutun. Taldi Samkeppniseftirlitið því ekki forsendur til að grípa til íhlutunar vegna samrunans í formi ógildingar eða með setningu skilyrða.