Kaup Pressunnar ehf. á tólf blöðum sem Fótspor ehf. gaf út

• Sækja skjal
• Málsnúmer: 33/2015
• Dagsetning: 23/12/2015
• Fyrirtæki:
  • Pressan ehf.
  • Fótspor ehf.
• Atvinnuvegir:
  • Fjarskipti, upplýsingatækni og fjölmiðlun
  • Prentmiðlar
  • Aðrir fjölmiðlar
• Málefni:
  • Samrunamál
• Reifun

  Samkeppniseftirlitið hefur haft til umfjöllunar samruna vegna kaupa Pressunnar ehf. á tólf blöðum sem Fótspor ehf. gaf út. Báðir samrunaaðilar starfa á fjölmiðlamarkaði. Fótspor hefur eingöngu starfað á markaði fyrir útgáfu blaða en starfsemi Pressunnar nær einnig til markaðar fyrir fjölmiðlun á netinu. Báðir aðilar starfa á markaði fyrir sölu auglýsinga í fjölmiðlum.

  Um er að ræða kaup Pressunnar á útgáfurétti að tólf blöðum sem útgáfufélagið Fótspor hefur haft með höndum undanfarin ár. Þau blöð sem um ræðir eru: Reykjavík vikublað, Akureyri vikublað, Reykjanes, Selfoss, Austurland, Vesturland, Vestfirðir, Hafnarfjörður, Kópavogur, Aldan, Birta og Sleggjan. Um er að ræða láréttan samruna þar sem samrunaaðilar starfa báðir á sömu mörkuðum. Samruninn fellur bæði undir samrunaákvæði samkeppnislaga nr. 44/2005 og samrunareglur fjölmiðlalaga nr. 38/2011.

  Að undangenginni rannsókn og með hliðsjón af gögnum málsins er það mat Samkeppniseftirlitsins að samruninn hindri ekki virka samkeppni á mörkuðum málsins og leiði ekki til myndunar eða styrkingar á markaðsráðandi stöðu. Þá leiðir samruninn ekki til þess að samkeppni á markaði raskist að öðru leyti með umtalsverðum hætti. Því eru ekki forsendur til að aðhafast vegna samrunans á grundvelli 17. gr. c samkeppnislaga. Samkeppniseftirlitið tekur hins vegar að fullu undir varnaðarorð fjölmiðlanefndar og beinir þeim tilmælum til samrunaaðila að hafa hliðsjón af þeim.