Samruni 365 miðla ehf. og IP-fjarskipta ehf. (Tal)

• Sækja skjal
• Málsnúmer: 39/2014
• Dagsetning: 10/2/2015
• Fyrirtæki:
  • IP-fjarskipti ehf.
  • 365 miðlar ehf.
• Atvinnuvegir:
  • Fjarskipti, upplýsingatækni og fjölmiðlun
  • Önnur tengd fjarskiptaþjónusta
• Málefni:
  • Samrunamál
• Reifun

  Samkeppniseftirlitið hefur haft til rannsóknar samruna 365 miðla ehf. og IP-fjarskipta ehf., á grundvelli samrunatilkynningar sem eftirlitinu barst fyrr í haust. Í kjölfar viðræðna við samrunaaðila hafa 365 miðlar ehf. fallist á að hlíta tilteknum bindandi skilyrðum í starfsemi sinni í því skyni að draga úr hættunni á mögulegum samkeppnishamlandi áhrifum samrunans. Á þeim grunni hefur Samkeppniseftirlitið heimilað samrunann.

  Samkvæmt framangreindu hafa 365 fallist á að sæta eftirfarandi skilyrðum í starfsemi sinni: 

  1. Óheimilt er að gera það að skilyrði fyrir kaupum á þjónustu sem fyrirtækið veitir á fjölmiðlamarkaði að fjarskiptaþjónusta félagsins fylgi með í kaupunum.

  2. Óheimilt að tvinna saman í sölu fjölmiðlaþjónustu fyrirtækisins og fjarskiptaþjónustu þess gegn verði eða viðskiptakjörum sem jafna má til slíks skilyrðis. Óheimilt er að gefa einstaka þjónustuþætti í heild sinni.

  3. Þá er tiltekið að innleiðingu og uppbyggingu þjónustu á farsíma- og sjónvarpsdreifingarmarkaði skuli lokið eigi síðar en 1. apríl 2016 og taka skilyrði þá að fullu gildi gagnvart þeirri þjónustu. Að öðru leyti taka skilyrðin strax gildi.

  4. Gæta skal gagnsæis í verðlagningu mismunandi þjónustuþátta fyrirtækisins.

  Framangreind skilyrði eru byggð á mati á samkeppnisaðstæðum á viðkomandi mörkuðum. Það mat byggir á gögnum og sjónarmiðum hjá fyrirtækjum og stjórnvöldum á fjölmiðla- og fjarskiptamörkuðum. Ennfremur var lagt mat á alþjóðlega þróun á fjölmiðlamarkaði, einkum hugsanlegra breytinga á markaði fyrir áskriftarsjónvarp.